دیمەنێك لە ئاهەنگی شەوانی هەولێر بەبۆنەی سەری ساڵ لە ساڵی رابردوو، فۆتۆ: شارەوانیی هەولێر
گۆرانی و هەڵپەڕکێ و یارییە ئاگریینەکان
هەولێر لە شەوی سەری ساڵدا دەیكات بە بەزم و ئاهەنگ
964+
ئەرسەلان عەبدوڵا
شارەوانیی هەولێر دەڵێت، لە شەوی سەری ساڵدا دەیكەین بە بەزم و شادی و ئاهەنگی گۆرانی و موزیك لە بەردەم قەڵا سازدەكەین، لەسەر قەڵاش یارییە ئاگریینەكان بەرەو ئاسمان دەتەقێندرێن.
سەرۆكایەتیی شارەوانیی هەولێر ئەمڕۆ یەكشەممە 29.12.2024 بڵاویكردەوە، جگە لەوەی فێستێڤاڵێكی خواردن و كاری دەستی لە پاركی ناو شار، كە لە 25ی ئەم مانگەوە دەستی پێكردووە، ئێوارەی 31.12.2024 كە دەكاتە شەوی سەری ساڵ ئاهەنگی گۆرانی و موزیك لە بەردەم قەڵا سازدەكرێت و هەریەكە لە هونەرمەندان كامەران ساڵح و محەمەد نەجاڕ گۆرانی دەڵێن و چەند چالاكییەكی هونەری پێشكەش دەكرێن.
شارەوانیی هەولێر ئەوەشی باس كردووە، درەنگانی شەویش و لەگەڵ نزیكبوونەوەی چركەساتەكانی ساڵی نوێ، بە نمايشێكى گەورەی ياریيه ئاگریینەکان لەسەر قەڵای هەولێر پێشوازی لە ساڵی نوێ دەکرێت.
لەوەتەی 25ی ئەم مانگەوە، لە پاركی ناوبازاڕ فێستیڤاڵێكی خواردن و كاری دەستی بۆ چەند كۆمپانیا و خواردنگەیەك بەبۆنەی ساڵی نوێ لە لایەن شارەوانیی هەولێرەوە دەستی پێكردووە و شەوان چالاكی هونەری بەڕێوەدەچێت، گەشتیاران و هاوڵاتیانیش ئامادەی دەبن.
پێشتر پارێزگای هەولێر و قایماقییەت رایانگەیاندبوو، بە فەرمی بەبۆنەی سەری ساڵەوە هیچ ئاهەنگ و بۆنەیەك بەبۆنەی سەری ساڵەوە رێكناخرێت.
