فڕۆکەخانەی نێودەوڵەتی هەولێر . وێنە: فڕۆکەخانەی هەولێر
لە رێگەی فڕۆکەخانەی نێودەوڵەتیی هەولێرەوە
تەرمی دیاری کامەران دوای نزیکەی سێ مانگ و نیو لە خنکانی دەگەڕێندرێتەوە زێدی خۆی
964+
شۆڕش قادری
دوای نزیکەی سێ مانگ و نیو، تەرمی دیاری کامەران ئەو گەنجەی لە نۆکەندی ئینگلیز خنکا دەگەڕێندرێتەوە زێدی خۆی.
رۆژی 15.9.2024 بەلەمێكی کۆچبەران بە 60 سەرنشینەوە لە نۆکەندی ئینگلیز ژێرئاو کەوت و بەهۆیەوە، هەشت کەس گیانیان لەدەست دا، کە یەکێکیان دیاری کامەران گەنجێکی خەڵکی دەربەندیخان بوو، هەر ئەو کات بە هەماهەنگی کەسوکارەکەی، نوێنەرانی حکومەتی هەرێم و حکومەتی عێراق هاتنەخەت بۆ ئەوەی تەرمەکەی بگەڕێننەوە کوردستان.
ئەمڕۆ شەممە 28.12.2024 کامەران محەمەد باوکی دیاری بە 964ـی وت، “لە فڕۆکەخانەی هەولێرین و چاوەڕێی وەرگرتنەوەی تەرمی کوڕەکەمان دەکەین”.
ئاماژەی بەوەش کرد، دوای گەیشتنەوەی بە خاکی کوردستان، تەرمەکەی دەبەنەوە دەربەندیخان و لە زێدی خۆیان، بەخاکی دەسپێرن.
دیاری کامەران تەمەنی نزیکەی 25 ساڵ بوو و دانیشتووی گوندی ئاوبارە بوو لە قەزای دەربەندیخان، لەگەڵ باوکی بەیەكەوە رۆیشتوونەتە دەرەوەی وڵات و بەنیازبوون خۆیان بگەیەنە بەریتانیا، بەڵام مەرگ مەودای نەدا و رۆژی یەکشەممە 15.9.2024 بەلەمەکەیان کە نزیکەی 60 کۆچبەری هەڵگرتبوو، لە نۆکەندی ئینگلیز پەکی کەوت و دیاری کامەران و حەوت کەسی تر خنکان، بەڵام باوکی بە سەلامەت دەرچوو.
تەرمی گەنجەکەی دەربەندیخان کە لە نۆکەندی ئینگلیز خنکا کەی دەگەرێنرێتەوە؟
