دڵشاد گەرمیانی دزی لێكراوه
964+
میلاد جەلال – کەلار
ماوەی 10 رۆژە لەنزیک شەقامی پشتێنەیی کەلار، 79 سندوقی هەنگ، لە دڵشاد گەرمیانی، ئەندامی پێشووی سەرکردایەتی کۆمەڵی دادگەری دزراون و تا ئێستا سۆراغی دیار نییە و کەس لەسەری دەستگیرنەکراوە.
دڵشاد گەرمیانی بە تۆڕی964ی وت “نزیکەی 11 ساڵە سەرقاڵی بەرھەمھێنانی ھەنگوینی سروشتیم، لە ناو کەلار و ناوچە شاخاویەکان سندوقە هەنگوینەکان دادەنێم، لە کۆی 400 سندوق 79 دانەیان دزراوە.
وتیشی، ئەو کەسەی کە سندوقەکانی بردووە کەسێکی شارەزابووە لە کاری ھەنگەوانی، چونکە ئەو سندوقانەی کە قورس بووە و ھەنگی زیاتر تیابووە ھەڵیبژاردوە و باریکردوە.
عەلی جەمال قدوری، وتەبێژی پۆلیسی گەرمیان بە تۆڕی964ی راگەیاند، ئەو هاوڵاتییە رۆژی 23ی کانونی دووەم، سکاڵای تۆمارکردوە، تا ئێستا لێکۆڵینەوە بەردەوامە و بۆ دەستگیرکردنی تۆمەتبارەکە و گەڕاندنەوەی سندوقەکان بۆ خاوەنەکەی.
سندوقە ھەنگەکان لە شارەدێی گردەگۆزینەی سەر بە قەزای کەلار بوون، بە دووری 200 مەتر لە شەقامی پشتێنەیی کەلار، کە شەقامێکی قەرەباڵغە و ھاتووچۆی بەردەوامی بارھەڵگری بەسەرەوەیە..
دڵشاد گەرمیانی، کە سندوقە هەنگەکانی لێدزراوە، ئەندامی پێشووی سەرکردایەتی کۆمەڵی دادگەری بووە و ماوەی چەند ساڵێکە دوور لە کاری سیاسی خەریکی بەخێوکردنی هەنگە.