بەرگری شارستانی سۆران لەڕێی 964ـەوە رێنمایی دەدات بەو کەسانەی روو لە ناوچە بەرزەکان دەکەن

964+

شۆڕش قادری

بەرگری شارستانی سۆران لەڕێی 964ـەوە رێنمایی دەدات بەو هاوڵاتیانەی لەم وەرزەدا روو لە ناوچە شاخاوییە بەرزەکان دەکەن و داوایان لێدەکات، بەر لە کاتژمێر 7ـی ئێوارە بگەڕێنەوە.

کاروان میراودەلی بەڕێوەبەری بەرگری شارستانی سۆران بە 964ـی وت، “ئاگاداری هاوڵاتیان و گەشتیاران دەکەینەوە کاتێک بۆ هەر مەبەستێک روو دەکەنە ناوچە زۆر ساردەکان و سەر شاخەکان بۆ نێو بەفەر، پێویستە بەرلە کاتژمێر حەوتی ئیوارە و بەرلە بەستنی شەقامەکان بەهۆی دابەزینی پلەکانی گەرما بۆ ژێر سفر هەوڵی گەڕانەوە بدەن”.

وتیشی، پێویستە ئۆتۆمبێلەکانیان لەجۆری دەبڵ ئەکسێڵ بێت یان زنجیر بۆ تایەکانیان ببەستن بۆ ئەوەی توشی گیرخواردن نەبن و مەترسی لەسەر گیانیان دروست نەبێت.

کاروان میراودەلی ئاماژەی بەوەشکرد، لە دوێنێوە تا ئەمڕۆ تیمەکانی رێگاوبانی سۆران  بەردەوام سەرقاڵی پاککردنەوەی رێگاکانن و تا ئێستا هیچ رێگایەک لەو سنورە نەگیراوە و گرفتی هاتوچۆ دروست نەبووە.

شەوی رابردوو سێ گەشتیاری عەرەب و خێزانێکی خەڵکی شەقڵاوە لە نزیک گوندی وێزەی باڵەکایەتی بەهۆی بەفرەوە گیریان خوارد و دواتر، تیمەکانی بەرگری شارستانی سۆران پێیان گەیشتن و بەبێ زیانی گیانی رزگاریان کردن.

رزگار کران.. ئەو سێ گەشتیار و خێزانەی گیریان خواردبوو

چەند گەشتیارێک لە وێزەی باڵەکایەتی لە ناو بەفر گیریان خواردووە

ئەو پیاوەی چوار رۆژە لە شاخەکانی سۆران ون ببوو دۆزرایەوە