نەمامگەی پارکەکانی هەولێر ساڵی یەک ملیار دینار دەگەڕێنێتەوە خەزێنەی حکومەت

964+

ژوولی عەدنان

نەمامگەی پارکەکانی هەولێر ساڵی یەک ملیار دیناریان لە خەرجی کڕینی دار و درەخت و گوڵ کەم کردووەتەوە و %100 بەرهەمی ناوخۆ بەکار دەهێنن.

هەموو پێداویستی پارکەکان و باخچەکان دابین دەکەن و هیچ شەتڵ و نەمامێک لە دەرەوەی کوردستانەوە ناکڕدرێت، پێشتر ساڵانە بە نزیکەی یەک ملیار دینار خەرجی کڕینی درەخت و نەمام بوو کە لە دەرەوە هاوردەیان دەکرد.

بەڕێوەبەرایەتی ئەندازەی پارکەکانی هەولێر سێ نەمامگەی گەورەی هەیە کە ساڵانە زیاتر لە 100 هەزار دار و گوڵی جیاواز بەرهەم دەهێنن.

رێبین ئەحمەد بەڕێوەبەری ئەندازەی پارکەکانی هەولێر بە 964ـی وت، ”لە دوای نەمانی بودجە و قەیرانی دارایی و بڵاوبوونەوەی پەتای کۆرۆنا، نەمانتوانی گوڵ و درەخت لە وڵاتانی وەک تورکیا و ئیتاڵیاوە بهێنینە کوردستان، هەربۆیە بیرمان لە درووستکردنی نەمامگەی تایبەت بەخۆمان کردەوە”.

وتیشی ” ساڵانە زیاتر لە 100 هەزار دار و گوڵ بەرهەم دەهێنن لە کاتێکدا پێشتر هەمووی هاوردە دەکرا و خەرجییەکی زۆری هەبوو، ساڵانە نزیکەی یەک ملیار دینار بۆ هێنانی گوڵ و درەخت خەرج دەکرا”.

باسی لەوەشکرد، کە بەرهەمی نەمامگەکە تەنیا بۆ هەولێر نییە و بۆ ناوچەکانی دیکەشی دەنێرن و هەموو ئەو بەرهەمە هی سێ نەمامگەیە، بەتەمان بەرهەمەکانیان زیاتریش بکەن.

شاری هەولێر خاوەنی زیاتر لە 450 پارک و باخچەیە، لەو ژمارەیە 20 پارکی گەورە هەیە.

تیمی ئەندازەی پارکەکانی هەولێر ئەم بەیانییە بە چالاکییەکی زۆر دەستیان پێکرد

ئەندازەی پارکەکانی هەولێر پشووی نییە