ئەفسەرێکی باڵای پۆلیسی کەرکوک بە رووداوی هاتوچۆ گیانی لەدەست دا

964+

کاروان ساڵحی – کەرکوک

لە رووداوێکی هاتوچۆی دیکەدا لە نزیک گوندی حەساری گەورە، ئەفسەرێکی پۆلیسی کەرکوک گیانی لەدەست دا.

درەنگانێکی ئەمشەو یەکشەممە 17.11.2024 بەڕێوەبەری پێشووی پاراستنی دامودەزگا حکومییەکانی کەرکوک و بنکەی پۆلیسی ناحیەی شوان، عەمید محەمەد سەعید ناسراو بە محەمەد گورگانی بە رووداوێکی هاتوچۆ گیانی لەدەست دا.

لە سێ رووداوی هاتوچۆدا دوو کەس گیانیان لەدەست دا و 10 کەسیش برینداربوون

عەدنان عەلی ئێشکگر لە نەخۆشخانەی ئازادی بە 964ـی وت، “ئەو ئەفسەرە لە نزیک گوندی حەساری گەورە ئۆتۆمبێلەکەی وەرگەڕاوە و بە سەختی بریندار بووە، دوای گەیاندنی بە نەخۆشخانە گیانی لەدەستداوە”.

عەمید محەمەد سەعید ئەفسەرێکی پۆلیسی کەرکوک بوو، پێشتر بەڕێوەبەری چەند بنکەیەکی پۆلیس بووە و بۆ چەند ساڵێکیش بەڕێوەبەری پۆلیسی پاراستنی دامودەزگا حکومییەکان بوو، دوایین پۆستیشی ئەندامی لیژنەی چاودێری و بەدواداچونی فەرماندەیی پۆلیسی کەرکوک بوو.

ئەوەش لەکاتێکدایە، ئەمڕۆ رۆژی جیهانیی قوربانیانی هاتوچۆ بوو و لە سێ رووداوی هاتوچۆی دیکەدا لە سنووری هەولێر و چەمچەماڵ، دوو کەسی تر گیانیان لەدەست دا و 10 کەسی دیکەش برینداربوون.

پێداچوونەوە: شۆڕش قادری