دهۆک.. چوار دوکان سووتان

+964

هیڤی دێوالی – دهوک

کاتژمێر دووی شەوی رابردوو، چوار دوکان لە سەنتەری پارێزگای دهۆک سووتان کە زیانی گیانیان نەبووە.

مەحمود رەشید، خاوەنی مارکێتێکە کە یەکێکە لەو چوار دوکانەی سووتاوە بە تۆڕی964ـی وت: درەنگانی شەو ئاگادارکرامەوە کە مارکێتەکەم و دوکانی کەلوپەلی ماسی کە دوکانێکی دیکەیە بە تەنیشت مارکێتەکەمەوە، سووتاوە.

دەشڵێت: هیچ زیانی گیانی نەبووە، بەڵام زیانی مادی بە هەردوو دوکان زیاتر لە هەشت هەزار دۆلارە، کە دەکاتە 80 وەرەقە.

بەرگری شارستانی دهۆک کاتژمێر 2:57 دەقە ئاگرەکەیان کۆنتڕۆڵکردووە.

بێوار عەبدولعەزیز، وتەبێژی بەرگری شارستانی دهۆک بە تۆڕی964ـی وت، تا ئێستا هۆکاری ئاگرەکە دەستنیشان نەکراوە و لێکۆڵینەوە لە رووداوەکە بەردەوامە بۆ دەستنیشانکردنی هۆکارەکەی.

لای خۆیەوە فواد عەبدولرەحمان، کە خاوەنی دوکانی مۆبایلە بە تۆڕی964ـی وت کە 30 هەزار دۆلاری لە سووتانی دوکانەکەی زیانکردووە.

پەیامنێری تۆڕی964 لە دهۆک دەڵێ: تەواوی هەر چوار دوکانەکە سووتاون، بەڵام لە رووی مادییەوە کەمترین زیان بە دوکانی فرۆشتنی بەروبومی سپیاتی کەوتووە.