دیمەنێکی سەنتەری ناحیەی سیروان ... وێنە؛ Sarxel Leonel
دروستكردنى باخچه‌یه‌ك له ناحیه‌ى سیراون
له‌هه‌ڵه‌بجه كۆمپانیایه‌كى دیكه‌ى گه‌یاندن پابه‌ندكرا له‌بری سه‌وزكردن جێبه‌جێ بكات
964+
فه‌رهاد حه‌سه‌ن
له هه‌ڵه‌بجه كۆمپانیایه‌كى دیكه‌ى گه‌یاندن له سنوورى پارێزگاكه پابه‌ندكرا له بری سه‌وزکردن جێبه‌جێ بكات و بۆ ئه‌م مه‌به‌سته‌ش باخچه‌یه‌ك له سه‌نته‌رى ناحیه‌ى یروان دروستده‌كات.
له‌برى سه‌وزكردن، پڕۆژه‌یه‌كی ده‌سته‌ى پاراستنى ژینگه‌یه له هه‌رێمى كوردستان بۆ ئه‌و كۆمپانیا و پرۆژانه‌ى كه كاریگه‌ری خراپیان له‌سه‌ر ژینگه هه‌یه، پابه‌ند ده‌كرێن كه سه‌وزایی بچێنن، هەر پڕۆژەیەکیش لە رووبەرەکەیدا مەودای زیادکردنی سەوزایی نەبێت، ئەوا لە شوێنێکی تر کە فەرمانگەی ژینگە بۆی دیاری دەکات ، پڕۆژەی لەبری سەوزکردن جێبەجێدەکات.
سه‌رهه‌نگ عه‌بدولڕه‌حمان، به‌ڕێوه‌به‌رى فه‌رمانگه‌ى ژینگه‌ى هه‌ڵه‌بجه به 964ـى راگه‌یاند، كۆمپانیاى سێڤن نێت پابه‌ندى له‌برى سه‌وزكردن كراوه و باخچه‌كه دروست ده‌كات.
وتیشی “ئه‌مه چواره‌مین كۆمپانیای گه‌یاندنه له سنوورى هه‌بڵه‌بجه پابه‌ند ده‌كرێن به‌م پڕۆژه‌یه و پێشتر هه‌ریه‌ك له كۆمپانیاكانى كۆڕه‌ن، فاستلینگ و زه‌ین پابه‌ند كراون”.
ئاماژه‌ى به‌وه‌كرد، له سه‌نته‌رى ناحیه‌ى سیروان دوو شوێن بۆ دروستكردنى باخچه‌كه ده‌ستنیشانكراون و له‌م رۆژانه بڕیار له‌سه‌ر یه‌كێك له‌و شوێنانه ده‌درێت و هه‌فته‌ى داهاتووش ده‌ست به دروستكردنى ده‌كرێت.
به‌قسه‌ى به‌ڕێوه‌به‌رى فه‌رمانگه‌ى ژینگه‌ى هه‌ڵه‌بجه ئه‌مه كۆتا كۆمپانیاى بوارى گه‌یاندنه له‌سنووره‌كه‌یان کە هەموویان پابەندی پڕۆژەی لەبری سەوزکردن کراون.
