بەشێک لە پارە گەڕێندراوەکانی دزی سەدە لە کۆنفرانسێکی رۆژنامەوانی سودانی پیشاندەدرێت. فۆتۆ: سۆشیاڵ میدیا
"وەزیریان تێدایە"
پەرلەمانتارێکی عێراق: دزییەکی دیکەی سەدە ئاشکرا دەکەم
964+
ژووری هەواڵ
ئەندامێکی پەرلەمانی عێراق لە نووسراوێکدا بانگەشەی ئەوە دەکات کە دزییەکی دیکەی سەدە ئاشکرا دەکات و دەڵێن لەم دزییەدا پارەی باجی سەر “ئاسن، بەردی مەڕمەڕ و ئەلەمنیۆم”ـی هاوردە بەتاڵان براوە.
ئەمڕۆ پێنجشەممە 26.9.2024، عەلی ساعدی، ئەندامی پەرلەمانی عێراق رایگەیاند، لە چەند بەدواداچوونێکدا بۆی دەرکەوتووە چەند کەسێک کە پلەی بەرزیان هەیە و تا ئاستی وەزیریش دەڕوات، تێوەگلاون لە وەرگرتنی دۆلار بە شێوەی نایاسایی و بە نرخی فەرمی لە بانکی ناوەندی و بەخشینی باج و گومرگ بە رێگەی نایاسایی.
ئەو پەرلەمانتارە دەڵێت، تۆمەتباران پێکهاتوون لە تۆڕێکی، کە پێکەوە کاردەکەن و کەلوپەلی بیناسازیان هاوردە کردووە بە ناوی ژمارەیەک کۆمپانیاوە، بەبێ ئەوەی کۆمپانیاکان ئاگاداربن.
عەلی ساعدی باس لەوەش دەکات، “کاتێک بەڵگەکان تەواو بوون، داواکاری گشتی لەو بارەیەوە ئاگادار دەکەمەوە”.
دزیی سەدە لە چییەوە هاتووە؟
“دزیی سەدە” ناونیشانی كەیسێكی دزیكردنە لە عێراق، كە لە ساڵی 2022 و لە سەردەمی کابینەکەی مستەفا کازمی ئاشكرا بوو، سەرەتا وا بڵاوکرایەوە دوو ملیار و 500 ملیۆن دۆلارە، بەڵام دواتر دەركەوت پارەکە و هەروەها ژمارەی تۆمەتبارەكان زیاترن، كە لە رێگەی چەكی بانكیی چەند كۆمپانیایەكەوە دزراوە و تۆمەتباری سەرەكییش كەسێكە بە ناوی نوور زوهێر.
پارە دزراوەکان هی داهاتی باج بوو، کە لە رێگەى پێنج کۆمپانیاوە لە نێوان ئابى 2021 و ئەیلوولى 2022 لە بانکی رافیدەین براوە.