کەمپی پەنابەرانی کوردانی باکوور لە مەخمور وێنە: سۆشیال میدیا
"کەسێک کوژراوە"
تورکیا بەرپرسیارێتی هێرشەکەی کەمپی مەخموری لەئەستۆگرت
964+
ژووری هەواڵ
دەزگای ھەواڵگریی نیشتمانیی تورکیا ناسراو بە میت، بەرپرسیارێتی خۆی لە هێرشێکی درۆنی لە کەمپی مەخمور راگەیاند و دەڵێت، لە ھێرشەکەدا کادرێکی دیاری پارتی کرێکارانی کوردستان کراوەتە ئامانج.
ئەمڕۆ هەینی 13.9.2024، میدیای فەرمی تورکیا رایگەیاند، دەزگای میت لە ئۆپراسیۆنێکدا لە کەمپی مەخمور ئازاد ئاکنجی بەئامانج گرتووە و لە ھێرشەکەدا گیانیلەدەستداوە.
دەشڵێت، ئازاد ئاکنجی بەرپرسی کەمپی مەخمور بووە و بە وردی چاودێری ئەو کەسەیان کردووە و لە دووری 160 کیلۆمەتر لە سنوری عیراق – تورکیا بە ئامانج گیراوە.
بەگوێرەی زانیارییەکانی دەزگای میت، ئازاد ئاکنجی لە ساڵی 2006ـەوە چووەتە ناو ریزەکانی پارتی کرێکارانی کوردستان و نزیکەی دوو ساڵ لێپرسراوی کەمپی مەخمور بووە.
هێرشەکە لە رێکەوتی 10.9.2024 ئەنجامدراوە و بەگوێرەی زانیارییەکانی پەکەکە، لەو هێرشەدا دوو کەس برینداربوون و باسی کوژرانی هیچ کەسێک نەکراوە.
