ئەو كەسەی مادەی هۆشبەری رەوانەی كوردستان دەكرد لە لوبنان دەستگیر كرا

964+

شۆڕش قادری

بازرگانێکی مەترسیدار لە دەرەوەی وڵات و هاوکات دوو بازرگانی دیکە لە ناوخۆ دەستگیرکران، هەروەها بری (10) کیلۆگرام کریستاڵ دەستی بەسەرداگیرا .

بەڕێوەبەرایەتی نەهێشتنی مادە هۆشبەرەکان لە هەولێر، لە راگەیەندراوێکدا دەڵێت، “لە بەردەوامی هەوڵەکانمان لە بەرەنگاربوونەوەی مادە هۆشبەرەکان، لە پرۆسەیەکی هەواڵگری ورد و بەدواداچوونی بەردەوام کە چەند مانگێکی خایاند، دوای وەرگرتنی رەزامەندی دادوەری لێکۆڵینەوەی ئاسایش لە رێکەوتی 5.9.2024   دوو بازرگانی ماددەی هۆشبەر بە (10) کیلۆگرام مادەی هۆشبەری جۆری کریستاڵەوە لە شارەكانی هەولێر و سلێمانی دەستگیرکران”.

“شوێنی بازرگانە سەرەکییەکە کە لە وڵاتی لوبنان نیشتەجێ بوو، دەستنیشان کرا و دوای هەماهەنگی بەڕێوەبەرایەتییەکەمان لەگەڵ بەڕێوەبەرایەتی نەهێشتنی مادە هۆشبەرەکانی حکومەتی عێراقی فیدڕال و ناردنی فەرمانی دەستگیرکردنی تاوانبارەکە بۆیان، لە 6.9.2024 هێزە ئەمنییەکانی وەزارەتی ناوخۆی لوبنان توانیان ئەو بازرگانە مەترسیدارە کە چەندین پێشینەی تاوان و فەرمانی دەستگیرکردنی هەبوو دەستگیر بکەن.” بەڕێوەبەرایەتی نەهێشتنی مادە هۆشبەرەکان وادەڵیت.

سزای لەسێدارەدان و زیندانی هەتاهەتایی بۆ 311 بازرگانی مادەی هۆشبەر دەرچوو

ئاماژەیان بەوەش کردووە، ئەم بازرگانە بە رەگەز کوردە و سەرچاوەی دابینکردنی بەشی زۆری ئەم مادە هۆشبەرانە بوو کە لە هەرێمی کوردستان و بەشێک لە پارێزگاکانی دیکەی عێراق ساغ دەکرایەوە و بڵاودەکرایەوە و ژمارەیەکی بەرچاو لەو بازرگانانەی کە لە هەرێم دەستگیراون و دراونەتە دادگا، لەم کەسەوە فێری ئەم بازرگانییە بوون و لەم کارە قێزەوەنە تێوەگڵاون.

بەڕێوەبەرایەتیی نەهێشتنی مادە هۆشبەرەکان راشیگەیاندووە، “لەم چالاکییەدا بەڕێوەبەرایەتیی نەهێشتنی مادە هۆشبەرەکانی سەر بە دەزگای ئاسایشی هەرێم/سلێمانی هاوکار و هەماهەنگمان بوون”.