لە سلێمانى
خانەنشینان زیادکردنەکەیان بەدڵ نییە
964+
دیلان محەمەد
خانەنشینان ئەمڕۆ بە هاوتاکراوى موچەکانیان وەرگرت، بەڵام بەدڵیان نییە و دەڵێن، خزمەتەکانیان شایەنى موچەیەکى باشترە.
جەمیلە سابیر کە 43 ساڵ لە کەرتى پەروەردەدا، وەک مامۆستا و بەڕێوەبەرى خوێندنگە و سەرپەرشتیارى پەروەردەیى خزمەتى کردووە، ئەمڕۆ 100 هەزار دینار خراوەتە سەر موچەکەى و بە هاوتاکراوى وەرى گرتووە، بەڵام وەک خۆى بە 964ـى وت،”خزمەتەکەم شایەنى موچەیەکى باشترە و ئەوەى ئێستا هەیە بەشى پێویستی و نەخۆشى ناکات”.
جەختیش دەکاتەوە، سەر بۆ موچە دانانەوێنن و ئەگەر موچەش نەبێت ئامادەن بۆ خزمەتکردنى کۆمەڵگە.
عائیشە عەبدول حەکیم کە هاوڕێى جەمیلە سابیرە و خانەنشینە، قسەى بۆ 964 کرد و ئەویش پێى وایە زیادکردنەکە بەشێوەیەک نییە کە پێویستییەکانى ژیانیان دابین بکات.
ئەمڕۆ دواى 58 رۆژ بەسەر دابەشکردنى موچەى مانگى شەش، فەرمانبەران و خانەنشینانى هەرێم موچەى مانگى حەوت وەردەگرن، ئەوەى جیاوازە ئەوەیە خانەنشینان بە هاوتاکراوى بەغداد موچە وەردەگرن.
پێداچوونەوە: وریا فەتاح
