زانیارییەكان دزەی كردووە
ئەپڵ وادەی نمایشکردنی ئایفۆن 16 ئاشکرا دەکات
964+
كارژین خەیروڵا
كۆمپانیای ئەپڵ رۆژی 9.9.2024 وەك وادەی گرنگترین رووداوی ساڵی خۆی راگەیاند، ئەویش نمایشكردنی ئایفۆنی 16یە.
چالاکییەکە کاتژمێر 8ی شەو بە کاتی هەولێر لە شانۆی ستیڤ جۆبس لە ئەپڵ پارک بەڕێوەدەچێت.
ئەپڵ نوێترین ئامێرەکانی خۆی نمایش دەکات، کە لە زنجیرەی نوێی ئایفۆن 16 دەستپێدەکات، لەگەڵ نوێترین وەشانی کاتژمێرە زیرەکەکەی و وەشانی نوێی هێدفۆنەکانی AirPods.
لەگەڵ نزیکبوونەوەی چالاکییەکە، هەندێک وردەکاری لەسەر زنجیرەی ئایفۆن 16 ئاشكرا بوون، ئەوەی دزەی پێكراوە و راپۆرتە رۆژنامەوانییەکانیش ئاماژەیان بە دیزاین و هەندێک زیادکردنی ناوخۆیی گرنگ بۆ مۆبایلە نوێیەکان كردووە.
پێدەچێت زنجیرەی ئایفۆن 16 بەشێکی زۆری دیزاینەكەی بپارێزێت کە لە زنجیرەی ئایفۆن 15دا دەرکەوتووە، لەگەڵ هەندێک گۆڕانکاری بچووک.
یەکێک لە گۆڕانکارییە دیارەکانی ئەمجارە چاوەڕوان دەکرێت لە زنجیرە نوێیەکەدا، زیادبوونی قەبارەی شاشەی ئایفۆن 16 پرۆیە، بەو پێیەی پێشبینی دەکرێت ئەم وەشانەی قەبارەی شاشەکەی 6.3 ئینج بێت، لەکاتێکدا ئایفۆن شاشەی 16 Pro Max قەبارەکەی زیاد دەکات تا 6.9 ئینج، ئەگەر ئەم چاوەڕوانییانە دروست بن، ئەمە یەکەمجار دەبێت قەبارەی شاشە پرۆفیشناڵەکانی ئایفۆن لە چەند ساڵێکدا زیاد بکات.
