964+
دواى دابەزینە گەورەکەى هەفتەى رابردوو
بۆ دووەم رۆژى لەسەریەک نرخى نەوت بەرز
964+
وریا فەتاح
لە دووەم رۆژى هەفتەى نوێى بازاڕى نەوت، نرخى نەوت پێچەوانەى کۆتاییەکانى هەفتەى رابردوو بۆ دووەم رۆژى لەسەریەک بە بەرزبوونەوە دەستیپێکرد.
لە کۆتاییەکانى هەفتەى رابردوودا دۆخى رۆژهەڵاتى ناوەڕاست و هەڕەشەى ئێران بۆسەر ئیسرائیل، نرخى نەوتى بەشێوەیەکى خێرا دابەزاند، بەڵام وا دوو رۆژە نرخەکەى بەرەو بەرزبوونەوە هەنگاویناوە.
بەپێى داتاکانى بازاڕى جیهانى بۆ ئەمڕۆ سێشەممە، هەر بەرمیلێک نرخی نەوتی برێنت بە 77 دۆلار و 33 سەنت مامەڵەى پێوە دەکرێت، بەوەش نرخەکەی 1.03% بەرز بووەتەوە.
هاوکات نرخی نەوتی سووکی تێکساسی ئەمریکا 74 دۆلار و 14 سەنتە بە رێژەى 1.20% بەرز بووەتەوە.
کوژرانى ئیسماعیل هەنییە، سەرۆکى مەکتەبى سیاسى بزوتنەوەى حەماسى فەلەستینى لە تاران و هەڕەشەى تۆڵەکردنەوە لە ئیسرائی لەلایەن ئێرانەوە، نرخى نەوتى بەشێوەیەکى خێرا دابەزاند و هێنایە 75 دۆلار لە کاتێکدا هەفتەى پێشووتر لە نزیک 85 دۆلارەوە مامەڵەى پێوە دەکرا.
هۆکارێکى دیکەى دابەزینى نرخى نەوت، بەرزى قەبارەى نەوتى کۆگاکراوى ئەمەریکییە.
