ژنێکی 24 ساڵان لە رووباری خابور خنکا

964+
شڤان عەبدوڵا – زاخۆ

ئێوارەی ئەمرۆ سێشەممە، ژنێکی تەمەن 24 ساڵان لە رووباری خابور لە نزیک گوندی خالش خنکا و تەرمەکەی لەلایەن تیمی بەرگری شارستانی زاخۆ دەرهێندرا.

جەمال هەسن، بەڕێوەبەری بەرگری شارستانی زاخۆ بۆ 964 وتی، لە هەبوونی رووداوێکی خنکان ئاگادارکراینەوە و دەستبەجێ سێ تیمان نارد بۆ شوێنی رووداوەکە، تیمەکانمان توانیان تەرمی ژنە 24 ساڵانیەکە بدۆزنەوە و لە ئێستادا لە پزیشکی دادی زاخۆیە.

سەبارەت بە چۆنیەتی رووداوەکە بەڕێوەبەری بەرگری شارستانی وتی، لە ئێستادا زانیاریمان نیە سەبارەت بە چۆنیەتی خنکانەکەی.

بەپێی ئامارەکانی بەرگری شارستانی زاخۆ بێت، ئەمە 10ـیەمین حالەتی خنکانە لەسنووری ئیدارەی سەربەخۆی زاخۆ، تەرمی سەرجەمیان لەلایەن بەرگری شارستانی زاخۆ دەرهێنراوە جگە لە منداڵێکی تەمەن پێنج ساڵان کە پێش سێ مانگ خنکابوو تا ئێستا تەرمەکەی نەدوۆزراوەتەوە.

پێداچوونەوە: میدیا گۆران