دیمەنێکی عەلوەی سلێمانی - وێنە: 964+
جەژن هۆکارەکەیەتی
فرۆشی عەلوەی سلێمانی بۆ نیوە دابەزیوە
964+
پێشەوا محەمەد
بەهۆی جەژنی قوربانەوە فرۆشی عەلوەی سلێمانی بۆ نیوە دابەزیوە، بەرپرسێکی عەلوەکە دەڵێت، بەر لە جەژن هاوڵاتیان پێویستییەکانیان کڕیوە و کاتی جەژنیش سەرقاڵی پشوو و سەفەر و ئیسراحەت دەبن.
بەپێی ئەو ئامارەی 964 لە عەلوەی سلێمانی وەریگرتووە، رۆژانی ئاسایی عەلوەکە لە نێوان 500 بۆ 600 تۆن سەوزە و میوە بۆ سلێمانی و پارێزگاکانی دیکەی عێراق بڵاودەکاتەوە.
سەروەر عەلی، سەرۆکی لیژنەی کشتوکاڵی لە سەندیکای عەلوەی سلێمانی بە 964ـی راگەیاند، لەم سێ رۆژەی جەژندا فرۆشی عەلوەی سلێمانی بۆ نزیکەی نیوەی رۆژانی ئاسایی دادەبەزێت و وەک دەڵێت، هەموو جەژنێکیش هەر وایە.
وتیشی، “یەکەم رۆژی جەژن عەلوە نەبوو، چونکە لە مەرزەکانەوە مامەڵەی بازرگانی وەستابوو، بەڵام لەمڕۆوە عەلوە هەیە و بە رێژەی کەمتر سەوزە و میوە دەهێندرێتە بازاڕەوە”.
رۆژانی بەر لە جەژن فرۆشی عەلوەکە لەنێوان 100 بۆ 150 تۆنی رۆژانە زیادی کردبوو.
“دوای جەژن هێنان و بڵاوکردنەوەی سەوزە و میوە لە عەلوەی سلێمانی ئاسایی دەبێتەوە، چونکە هاوڵاتیان دەکەونەوە سەر ژیانی ئاساییان و پێویستییە رۆژانەکانیان دەکڕنەوە”، ئەوەش قسەی سەروەر عەلییە.
