سەبەتە خۆراکەکان بە ئامادەکراوی - وێنە: پەیجی ناحیەی بیارە لە فەیسبووک
هەوڵی دابینکردنی زیاتر دەدرێت
100 سەبەتەی خۆراک لە بیارە دابەش کرا
964+
پێشەوا محەمەد
لە سەنتەری ناحیەی بیارە 100 سەبەتەی خۆراک دابەش کرا و بەڕێوەبەری ناحیەکە دەڵێت، لە هەوڵی دابینکردنی زیاتردان بۆ تەوێڵە و گوندەکانی دەوروبەری.
ئەو سەبەتە خۆراکە خێرخوازییە لە لایەن رێکخراوی سەروەریی هەڵەبجەوە دابین کرابوو و لە برنج، نۆک، فاسۆلیا، نیسک و رۆن پێکهاتبوو.
حەمید بارام، بەڕێوەبەری ناحیەی بیارە بۆ 964ـی روونکردەوە، لەمکاتەدا کە بارودۆخی هاوڵاتیان خراپە دابەشکردنی ئەو سەبەتە خۆراکە سوودی زۆری بۆ خێزانە هەژارەکان هەیە.
وتیشی، “لیژنەیەکیان هەیە و لە رێگەی ئەو لیژنەیەوە ئەو خێزانانە دیاری کراون، کە پێویستیان بە هاوکاریکردنە و بە شێوەیەکی دادپەروەرانە سەبەتە خۆراکەکە دابەش کرا”.
سەنتەری قەزای بیارە نۆ هەزار ماڵی تێدایە و نزیکەی پێنج هەزار دانیشتووی هەیە.
بە وتەی بەڕێوەبەری ناحیەکە، هەوڵ هەیە بۆ تەوێڵە و گوندەکانی دیکەی دەوروبەریش ئەو سەبەتە خۆراکە دابین بکرێت.
