داوا دەکرێت کارەکانی پڕۆژەی ئاوی دەربەند – رانیە خێراتر بکرێت

964+

پێشەوا محەمەد

ئاوی راپەڕین داوا دەکات پڕۆژەی ئاوی دەربەند – رانیە خێراتر بکرێت، چونکە بە تەواوبوونی کێشەی ئاو لە سنوورەی قەزای رانیە، حاجیاوا و چوارقوڕنە چارەسەر دەبێت.

پڕۆژەکە لە ساڵی 2005ـەوە دەستیپێکراوە، چەند جارێک وەستاوە و لە سەرەتای ساڵی رابردووەوە ئیشکردن تێیدا دەستیپێکردووەتەوە.

سەلام عومەر، بەڕێوەبەری ئاوی راپەڕین بە 964ـی راگەیاند، ئیشوکارەکانی زۆر سستن و کۆمپانیای جێبەجێکار دەڵێت، قەیرانی دارایی هەیە و حکومەتی هەرێم سلفەی بۆ خەرج ناکات.

وتیشی، “پڕۆژەکە 80%ـی کارەکانی تەواو بووە، ئەگەر تەواو بکرێت کێشەی ئاوی سنووری رانیە، حاجیاوا و چوارقوڕنە چارەسەر دەبێت و هاوڵاتیان سنوورەکە سوودێکی زۆری لێوەردەگرن”.

پڕۆژەکە 600 هەزار دۆلاری بۆ تەرخان کراوە.

“کێشەی ئاو لە سنوورەکە زۆرە و بۆ گەڕەکە نوێکانیش پەنامان بۆ بیرلێدان بردووە، ئەگەر ئەو پڕۆژەیە تەواو بێت دەتوانین بیرەکان لە کارکردن بووەستێنین و ئاویان لێوە بەکارنەهێنین”، ئەوەش قسەی سەلام عومەرە.

داهاتی ساڵی رابردووی ئاوی راپەڕین زیاتر لە دوو ملیار دینار بووە