کاتی چاکسازیکردن لە بیری یەکێک لە باخچەکانی سلێمانیدا - وێنە: باخچەکانی سلێمانی
چەند لیتر ئاویان پێویستە؟
سەرچاوەی ئاوی باخچەکانی سلێمانی بۆ وەرزی هاوین ئامادە دەکرێن
964+
پێشەوا محەمەد
بەڕێوەبەرایەتیی باخچەکانی سلێمانی نایەوێت لە وەرزی هاویندا کێشەی ئاودێریی لە باخچەکانیدا دروست ببێت، بۆیە ئێستا هەر بیر و خەزانێک کێشەیان هەبێت چاکیان دەکەن.
بەڕێوەبەرایەتییەکە خاوەنی 506 باخچەیە، زیاتر لە 350 باخچەیان بیر و خەزانی ئاوی خۆیان هەیە و ئەوانەی نیشیانە هاوینان بە تانکەر ئاو دەدرێن.
عەلی حامید، وتەبێژی بەڕێوەبەرایەتیی باخچەکانی سلێمانی بۆ 964ـی روونکردەوە، سیستمی ئاودێریی باخچەکان، یان خەزانەکان، یاخود بۆری و غەتاسی بیرەکان هەرکامیان کێشەیان هەبێت ئێستا چاک دەکرێن.
لەناو شاری سلێمانی جگە لەو باخچانە 90 بلواریش بوونیان هەیە.
وتەبێژی باخچەکانی سلێمانی وتیشی، “بۆ بلوارەکان و سەرچاوە ئاوییەکانیان هەمان رێگامان گرتووەتەبەر و کێشەی ئاو و بیرەکانیان بەر لە وەرزی ئاودان هەمووی چارەسەر دەکەین”.
بە پێی ئامارەکانی بەڕێوەبەرایەتییەکە، ساڵی رابردوو 29 باخچە و بلواری نوێ لەناوشاری سلێمانی سەوز کراون، هەروەها سەرجەم باخچە و بلوارەکان 400 ملیۆن لیتر ئاویان ویستووە.
