لۆگۆی سەرۆکایەتیی شارەوانیی پێنجوێن
هەزار و 500 موڵکی هەیە
شارەوانیی پێنجوێن: دەسەڵاتی خەرجکردنی راستەوخۆی 15%ـی داهاتمان لێسەندراوەتەوە
964+
پێشەوا محەمەد
سەرۆکی شارەوانیی پێنجوێن گلەیی دەکات لەوەی حکومەت دەسەڵاتی خەرجکردنی راستەوخۆی 15%ـی داهاتی لێسەندوونەتەوە و دەڵێت، موڵکێکی زۆریان هەیە و داهاتیان باشە.
شارەوانییەکە بانگەوازی بۆ بەکرێدانی پێشانگایەکی ئۆتۆمبێل و ئاشێکی ئارد کردووە، بەو دووانەوە بەڕێوەبەرایەتییەکە خاوەنی هەزار و 500 موڵکە، کە بەکرێی داون.
رەئوف رەشید، سەرۆکی شارەوانیی پێنجوێن بە 964ـی راگەیاند، ئەو موڵکانە هەمەجۆرن، زەوی و دوکان و باڵەخانە و کارگە و خانوو و چەند جۆرێکی ترن و هەموو کەسێک دەتوانێت داوایان بکات و بەکرێیان بگرێت.
سەرۆکی شارەوانیی پێنجوێن بڕی داهاتەکەی ئاشکرا نەکرد، بەڵام وتی، “موڵکەکان لە یەک ساڵ بۆ 15 ساڵ دراون بەکرێ و لە وادەی تەواوبوونی گرێبەستەکاندا بانگەوازیان بۆ دەکرێت و بە زیادکردنی ئاشکرا دەدرێنەوە بە کرێ”.
بە پێی زانیارییەکانی 964، بڕیاری گەڕانەوە و رەزامەندی وەرگرتنی ئەنجومەنی وەزیران بۆ خەرجکردنی 15%ـی داهاتی شارەوانییەکان بۆ سەرجەم شارەوانییەکانی هەرێمی کوردستانە.
