مۆنۆمێنتی شەهیدان لە پارێزگای هەڵەبجە - وێنە: 964
دوو رۆژ دەمێننەوە
دوو پزیشکی ئێران بۆ چارەسەری بەرکەوتووانی چەکی کیمیاوی دێنە هەڵەبجە
964+
ژووری هەواڵ
بڕیارە مانگی داهاتوو تیمێکی پزیشکی پسپۆڕی چەکی کیمیاوی بچنە هەڵەبجە، تەندروستی پارێزگاکە داوا لە بەرکەوتووانی چەکی کیمیاوی دەکات سەردانی نەخۆشخانەی کیمیاباران بکەن بۆ ئامادەکردنی دۆسیە و پێداویستییەکانیان.
تیمە پزیشکییەکەی ئێران لە دوو دکتۆر پێکدێن و هەر یەکێکیان ستافی تایبەتی خۆی لەگەڵدایە، لە رێکەوتی 3.3.2024 دێنە هەڵەبجە و بۆ ماوەی دوو رۆژ بێبەرامبەر پشکنین و چارەسەر بۆ بەرکەوتووان ئەنجامدەدەن.
ئەمڕۆ چوارشەممە 21.2.2024، د. ئازاد مستەفا، بەڕێوەبەری تەندروستی هەڵەبجە بە 964ـی وت، لە ماوەی ئەو دوو رۆژەی کە پزیشکەکان دەمێننەوە لە بەیانی تا ئێوارە دادەنیشن و دەتوانن پشکنین بۆ 300 نەخۆش ئەنجامبدەن و چارەسەریان پێبدەن.
یەکێک لە پزیشکەکان پسپۆڕی چاوە، ئەوەی دیکەیان پسپۆڕی هەناسەیە کە دەتوانن کێشەی تەندروستی سییەکان و چاو و گلێنە دیاریبکەن و چارەسەریان بۆ دیاریبکەن.
رۆژی 16.3.1988 فڕۆکەکانی حکومەتی ئەوسای عێراق، شاری هەڵەبجەیان بە چەند جۆرێکی گازی ژەهراوی بۆمبارانکرد، لەنێو ئەو گازانەی بەکارهاتوون گازی سارین و Mustard Gas کە زۆرترین کەس بەدەست پاشماوەکەنی ئەو گازە خنکان.
لە مانگی سێی ساڵی رابردوودا، رەزامەندی بۆ خەرجکردنی بڕی 262 ملیۆن دینار وەرگیرا، بە مەبەستی ناردنەدەرەوە و چارەسەرکردنی 64 کەس کە بەرکەوتەی چەکی کیمیایین و بەهۆی سووتانی گلێنەیان بە گازی خەردەل، بیناییان لە مەترسیدابوو.
