ئاڵا عومەر وادەڵێت
“ماهیر حەسەن زوو زوو لە حیوار لادەدات و دەبێت بیهێنیتەوە”
964+
دیلان محەمەد – سلێمانی
خانمە هونەرمەندی ناسراوی دراما و شانۆی کوردی ئاڵا عومەر، لە کاری هونەری دوورکەوتووەتەوە و قەناعەتی بەم کارانەی ئێستاش نییە و دەشڵێت، لە رۆڵی کۆمیدیا مورتاحم.
ئاڵا عومەر ساڵانێکە خزمەت بە هونەری کوردی دەکات و لە هەردوو بواری کۆمیدیا و تراژیدیا رۆڵی بینیوە، ماوەیەکە زۆر کەم دەردەکەوێت و لەمبارەیەوە تایبەت بە 964 وتی، “قەناعەتم بەو ئیشانەی ئێستا نییە کە دێنە بەردەمم جا لەرووی سیناریۆ بێت یان کارئەکتەر، لە هەردوو بواری تراژیدیا و کۆمیدیا سەرکەوتووم، بەڵام لە رۆڵی کۆمیدیا مورتاحم و بەتایبەت ئەگەر رۆڵەکەم لەگەڵ ماهیر حەسەن بێت، هەرچەند لە حیوار دەڕوات و دەبێت بیهێنیتەوە”.
ئاڵا عومەر لەدایکبووی 1963 لە شاری سلێمانی، جگە لە بواری نواندن سەرەتاکانی دەرکەوتنی گۆرانیشی وتووە و لە ساڵی 1982 بە گۆرانی (ئێوارەیە گڤەی با دێ) ناسراو کە بە دوێت لەگەڵ نەوزاد مەحمود وتویەتی و ئەندامی تیپی مۆسیقای سلێمانی بووە.
پێداچوونەوەی : پەری ساڵح
