کارمەندێکی کۆگاکانی بەرگریی شارستانیی هەولێر بریندار بوو

ئەحمەد مستەفا

کارمەندێکی بەرگریی شارستانیی هەولێر، لە رووداوی ئاگرکەوتنەوەی کۆگای گوێر برینداربوو، وتەبێژی بەرگریی شارستانیی هەولێر بە 964ی وت، “پەراسوویەکی شکاوە”.

لە کاتژمێر 2:40 خولەکی بەرەبەیانی ئەمڕۆ سێشەممە، ئاگر لە پاڵاوگەیەکی سووتەمەنی لەسەر رێگای گوێر کەوتەوە و دوای هەشت کاتژمێر کۆنترۆڵ کرا، بەهۆی کاریگەری ئاگرەکە سێ کەسی مەدەنی برینداربوون.

پاش کۆتایهاتنی ئەرکەکەیان دەرکەوت کارمەندێکی بەرگریی شارستانیی هەولێریش، لە ناو رووداوی ئاگرکەوتنەوەکەدا، بەربووەتەوە و پەراسوویەکی شکاوە، دواتر رەوانەی نەخۆشخانەی فریاکەوتنی رۆژئاوای هەولێر کراوە.

کاروان میراودەلی، وتەبێژی بەرگریی شارستانیی هەولێر بە 964ی وت، ئەو کەسەی بریندار بووە، کارمەندێکی بەتوانای بنکەی بەرگریی شارستانیی کۆگاکانە و خەڵکی قەزای دوبزە، لە پێنج کاتژمێری کارکردندا دووچاری برینداربوون هاتووە.