شەوانی تر ئەم شوێنە مێز و عارەبانەی لێ بووە، ئێستا بەچۆڵی دەردەکەوێت. وێنە:شارەوانی هەولێر.
"ئیدی ناتوانن مێز و عارەبانەکان دابنێنەوە"
مێز و عارەبانەی فرۆشیارە بیانییەکانی ناو بازاڕی هەولێر لادران
964+
فەهمی نەبی
شارەوانی هەولێر ئەمشەو شەممە هەڵمەتێکی دەستپێکردووە ئەو مێز و عارەبانانەی لەسەر شۆستە و شەقامەکانی ناو بازاڕ هەبوون و خەڵکی بیانی خاوەنی بووە، سەرجەمیانی دەستیانبەسەر داگیراوە.
نەبەز عەبدولحەمید قایمقامی هەولێر بە 964ی وت، “ئەو مێز و عارەبانانە ژمارەیەکی ئێجگار زۆربوون، خاوەنەکانیان بەنگلادیشی و سوری و خەڵکی وڵاتی دیکە بوون، بڕيارمانداوە سەرجەمیان دەستبەسەردابگرین”.
بەوتەی قایمقامی هەولێر، ئەو هەڵمەتە لەپێناو ئەوەیە دەرفەت بە خەڵکی ناوخۆ بدرێت لەو شوێنانە کار بکات.
ئەوەش دەڵێت، “ئەوە بڕیاری کۆتاییە و هیچی دیکە رێگەنادەین خەڵکی بیانی لەناو بازاڕ عارەبانە و مێز دابنێن”.
لەبازاڕی هەولێر مێز و عارەبانچی و دەستگێڕەکان جلوبەرگ و پێڵاو و چەندین کەرەستەی دیکەیان بە نرخێکی هەرزان دەفرۆشت.
