لە 27 کۆمپانیا 13یان داخراون

شاخەوان عومەر

لە کۆی 27 کۆمپانیا 13 کۆمپانیای شۆڤاژ مۆڵەتیان لێ وەرگیراوەتەوە، هەوڵ هەیە لە پێنج ساڵ داهاتوودا سیستمی کۆگاکردنی غاز لە ماڵان و شوێنە گشتییەکاندا نەمێنێ و دەکرێتە بۆریکێش

سیستمی شۆڤاژ، گەرمکردنی ماڵانە لە رێگای غازی شل لە جیهان و هەرێمی کوردستانیشدا، بەڵام کێشەی ئەو غازە خێرا گڕگڕتنییەتی، پارساڵ لە دوو رووداوی جیاوازدا تەقینی غازەکە لە سلێمانی و هەولێر گیانلەدەستدان و برینداربوونی زۆری هاوڵاتیانی لێکەوتەوە.

موقەدەم کاروان عەلی گوتەبێژی بەرگریی شارستانیی هەولێر بۆ 964 وتی، پاش رووداوەکانی پار، بۆ ماوەی چەند مانگێگە پڕۆژەکان وەستێندراون، لیژنەکانی پشکنین و چاودێری لە کۆی 27 شوێن کۆمپانیا مۆڵەتی کارکردنیان لە 13یان سەندووەتەوە.

هەر بەوەندەش نەوەستاون، وەک وتەبێژی شارستانی دەڵێت، گەڕان و پشکنین بۆ کەلوپەلی کۆمپانیاکان بەردەوامە.

ئاماژەی بەوەش کرد، هەوڵ دەدرێت لە پێنج ساڵی داهاتوودا، سیستمی بۆریکێش جێبەجێ بکڕێت و چیتر غاز لە ماڵەکان کۆگا نەکرێت، بەڵکو بکرێتە یەک کۆگای ناوەندی غاز و لەوێوە دابەشی سەر ماڵان بکرێت، چونکە ئەو پڕۆسەیە سەلامەتترە.