روڤیا بێ پارکی گشتییە و هاوڵاتیەکانی گلەییان هەیە

964+

زەید کۆچەر – دهۆک

ناحیەی روڤیا تا ئێستا پارکێکی گشتی نییە و هاوڵاتیان ئەگەر بیانەوێت سەردانی پارک بکەن دەبێت بچنە ئاکرێ یان بەردەڕەش.

نەبوونی پارکی گشتی لە ناحیەی روڤیا بووەتە کێشە و بەڕێوەبەرایەتی ناحیەش بەڵێنی ئەوەی داوە پارکێکیان بۆ دروست بکرێت.

سەعید ئەکرەم، هاوڵاتیەکی ناحیەی روڤیایە و بە 964ـی وت، تا ئێستا پارکی گشتی لە ناحیەکەیاندا نییە، هەم خێزان و هەم منداڵەکانیان بێ بەشن لە چوونە پارک و کات بەسەربردن لە پارکدا، ئەگەر منداڵەکانیان داوای چوونە پارک بکەن دەبێت رێگەیەکی دوور ببڕن و بچنە قەزاکانی بەردەڕەش یان ئاکرێ.

مەنهەل موەفەق، بەڕێوەبەری ناحیەی روڤیا بە 964ـی وت، لە پلانی ساڵی 2023دا شوێن دەستنیشانکراوە بۆ دروستکردنی پارک و 400 ملیۆن دیناری بۆ دانراوە و چاوەڕێی وەڵامی پارێزگای دهۆکن بۆ جێبەجێ کردن.

بەپێی داتاکانی سەرۆکایەتی شارەوانی دهۆک لە سەنتەری پارێزگای دهۆک تاوەکو ئیستا 179 پارک و باخچەی بچووک هەیە و لەسەرانسەری پارێزگای دهۆک بە هەموو قەزا و ناحیەکانەوە 150 پارک و باخچە بوونی هەیە.

ناحیەی روڤیا سەر بە قەزای بەردەڕەشە و ژمارەی دانیشتوانەکەی 52 هەزار کەسن و 48 گوندی لەسەرە.

پێداچوونەوە: توانا نەقی

قوتابیانی ناحیەی رۆڤیا داوای بەرزە پرد دەکەن