وێنەی ژنێک لە کاتی دووگیانیدا - وێنە: socialmedia
پزیشکێکی پسپۆڕ وەڵام دەداتەوە
ماکیاجکردن لە کاتی دووگیانیدا زیانی هەیە؟
964+
پێشەوا محەمەد
پزیشکێکی پسپۆڕی ژنان و منداڵبوون هۆشداری دەداتە ژنان و دەڵێت، گرنگە ژنان لە کاتی دووگیانبووندا بە شێوەیەکی سەلامەت ماکیاج بکەن.
“کاتێک ژنان ماکیاج دەکەن جەستەیان بەر 175 مادەی کیمیایی دەکەوێت و زۆرینەیان دەگەنە خوێن و دەتوانن بەناو وێڵاشدا تێپەڕن”، ئەوە قسەی چرۆ حسێن، پزیشکی پسپۆڕی ژنان و منداڵبوونە بۆ 964.
بە بڕوای ئەو، باشترە لە کاتی دووگیانبووندا کەمترین ماکیاج بەکاربێت و لە کاتی بەکارهێنانیشدا نەچێتە ناو دەمەوە.
دەشڵێت، یەکێک لە دیاترترین مادە کیمیاییەکان رەساسە و دەبێتە هۆی دروستکردنی مەترسی لەسەر کۆرپە و ژەهراویبوونی.
پزیشکەکە لەسەر زیانەکانی تری ماکیاج لە کاتی دووگیانبووندا زانیاری زیاتری لایە، “زۆرێک لەو مادە کیمیاییانە دەبنە هۆی گۆڕانی هاوسەنگی هۆرمۆنەکان و ئەوەش کاریگەری دەکاتە سەر کۆرپە لە کاتی گەشەکردنیدا”.
هەموو ئەوانە وای لەو پزیشکە کردووە هۆشداری بداتە ژنان، کە لە کاتی دووگیانیدا بەدوای ماکیاجی سروشتیدا بگەڕێن، “چونکە زیانەکانی کەمترە”.
