بەشێک لەو کەلوپەلانەی کە لە یەکێک لە نۆڕینگەکاندا بینراوە. فۆتۆ: تەندروستی راپەڕین
هۆشداری دراوە بە چوار شوێنی دیکە
لە حاجیاوا شەش شوێنی پزیشکی داخران
964+
هاوبەش ئەبوبەکر
لە قەزای حاجیاوا شەش نۆرینگە، تاقیگە و دەرمانخانە داخران، چوار شوێنی دیکەش هۆشداریان پێدراوە کە دادەخرێن و پێبژاردنیان بۆ کراوە.
ئەمڕۆ سێشەممە 10.10.2023، تەها محەمەد بەڕێوەبەری راگەیاندن و پەیوەندییەکانی تەندروستی راپەڕین بە 964ـی وت، ئەو شوێنانەی کە داخراون، پابەندی رێنماییەکانی وەزارەتی تەندروستی و سەندیکا پەیوەندیدارەکان نەبوون.
وتیشی، تاوەکو جێبەجێکردنی رێکارەکان رێگە بە کردنەوەی ئەو شوێنانە نادرێت.
حاجیاوا دەکەوێتە ئیدارەی راپەڕین، لە 21.7.1999 لە کۆمەڵگایەکی زۆرەملێوە کراوە بە ناحیە. نزیکەی 75 هەزار دانیشتووی هەیە و 24 گوندی بەسەرەوەیە.
مانگی نیسانی ساڵی رابردوو، بە فەرمانی حکومەتی هەرێمی کوردستان کرا بە قەزا.
