دارى به‌ڕوو و مازوو له خانوه‌كان به‌كارهێندراون
شوێنه‌وارێك ده‌یسه‌لمێنێت گه‌لانى زاگروس له پشده‌ر بوون
964+
محەمەد عەلی – پشده‌ر
شوێنه‌وارناسێك ده‌ڵێت، ئه‌نجامى هەڵکۆلینی ناوچەیه‌كی شوێنەوار، ده‌ریخستووه كه گه‌لانى زاگرۆس له پشدەر بوونه و دارى به‌ڕوو و مازووش له خانوه‌كان به‌كارهێندراوه.
هه‌ڵكۆڵینه‌كه، لەلایەن زانکۆی میونیخی ئەڵمانی، بە هاوبەشی شوێنەواری سلێمانی و راپەڕین ئەنجام دراوە.
به‌کر قاسم، شوێنەوارناسی زانکۆی راپەڕین بە 964ـى وت، لە 19.8.2023 وه دەستمان بە هەڵکۆلین کردووە و ئێستاش کاری هەڵکۆڵینیان کۆتایی پێهاتووە.
ئاشكراى كرد، بیناسازیەکی گەلانی زاگرۆسیان دەستکەوتوە كه لە قوڕ و بەرد دروستكراوه، ده‌ركه‌وتووه كه ئه‌و شوێنه شارەدێیەکی گەورەی ئەوکات بووە.
وتیشی “خانوەکانیان بەشێوازێکی وا دروستکردوە کە بەرگەی سەرمای سەختی ناوچەکە بگرێت، ته‌نانه‌ت داری بەڕوو و مازوو بۆ بنمیچى خانوه‌كان به‌كارهێندراوه له هه‌ندێ ژووره‌كانیش ته‌ندروى لێ دروستكراوه بۆ مه‌به‌ستى ئاماده‌كردنى خواردن”.
به‌قسه‌ى ئه‌و شوێنه‌وارسه، مێژوو ئه‌م شوێنه، دەگەڕێتەوە بۆ نزیکەی دوو هەزار ساڵ له‌مه‌وبه‌ر و ئەم هەڵکۆڵینەوه‌شیان پشتڕاستی دەکاتەوە کە گەلانی زاگرۆس خاوەنی داهێنان و لەوپەڕی پێشکەوتندا بوونه .
باسی له‌وه‌شكرد، ته‌واوى ئەو پارچە شوێنەواریانەی دۆزراونه‌تەوە، ده‌نێردرێنه شوێنەواری سلێمانی.
پێداچوونه‌وه: فه‌رهاد حه‌سه‌ن
