وەزارەتی تەندروستی - وێنە: 964
وەزیری تەندروستی: نزیکەی ٪27ـی دەرمانەکان نرخیان دابەزێنراوە
964+
هاوبەش ئەبوبەکر
لە ماوەی یەک ساڵدا نزیکەی ٪27ـی دەرمانەکانی هەرێمی کوردستان نرخیان دابەزێنراوە و کوالیتیان بەرزکراوەتەوە.
ئەمڕۆ هەینی 8.9.2023، سامان بەرزنجی وەزیری تەندروستی هەرێمی کوردستان لە فەیسبوک رایگەیاند، لەرێگەی تیمی راوێژکاری ئەنجومەنی وەزیران، لە ساڵی رابردوودا بەدواداچوون بۆ پڕۆژەیەک کرا بۆ ئەوەی دەرمان بە ھەمان نرخ و کوالێتی بۆ ھەموو شار و شارۆچکەکانی کوردستان لە یەک سەرچاوەوە بکڕدرێت.
وتیشی، لەرێگەی ئەو پرۆژەیەوە دەرمان کوالێتیەکەی باشتر و ھەرزانتر دەبێت، ھەروەھا گرێبەستەکەشی درێژخایەنتر دەبێت و زۆربەی کۆمپانیا نێودەوڵەتییەکان و ناوخۆییەکانیش دەتوانن بەشداربن.
“نزیکەی 27٪ـی نرخەکان دابەزێنران، خەرجیی کەمبووەوە و کوالێتیەکەشی بەرزتر بووە، ئێستاش دەرمانەکان ھەرزانتر دەکڕدرێن و بەشێکی زۆریشی بەرھەمی کارگە و کۆمپانیا ناوخۆییەکانە”، وەزیری تەندروستی وای وت.
ئەو پڕۆژەیە 156 جۆری دەرمان بە کوالێتییەکی بەرز دابین دەکات، کە بەشێکی دەرمانی نەخۆشییە درێژخایەن و سەرەکییەکانن.
