ئەمساڵ 600 هەزار نەمام لە کوردستان چێندراون

پێشەوا محەمەد

بەرپرسێکی وەزارەتی کشتوکاڵ ئاشکرای دەکات، لە سەرەتای ئەمساڵەوە تا ئێستا 600 هەزار نەمام لە هەرێمی کوردستان چێندراون.

بەپێی زانیارییەکانی وەزارەتەکە، رووبەری دارستانی هەرێم دوو ملیۆن و نیو دۆنم زەوییە. شەش ملیۆن دۆنم زەوی پاوان و شەش ملیۆن دۆنم زەوی داچێندراویش لە کوردستان بوونیان هەیە.

هەڵکەوت عەبدولڕەحمان، بەڕێوەبەری گشتی باخداری و دارستان و پاوان لە وەزارەتی کشتوکاڵ و سەرچاوەکانی ئاوی حکومەتی هەرێم بە 964ـی راگەیاند، ئەو دارستانانە گرنگییەکی ئێجگار زۆریان بۆ کوردستان و ژینگەکەی هەیە و وەزارەتی کشتوكاڵ بە گرنگییەوە لێیان دەڕوانێت.

وتیشی، “چاندنی ئەو نەمامانە بۆ زیادکردنی ئەو رووبەرە دارستان و سەوزاییەیە کە لە بەرنامە یەکەمینەکانی وەزارەتی کشتوکاڵدایە”.