لێکردنەوەی تابلۆ بازرگانییەکان - وێنە: شارەوانی هەولێر
هەر شەش شارەوانییەکە دەگرێتەوە
تابلۆ و ریکلامە بازرگانییە نایاساییەکان لە شەقامەکانی هەولێر لادەبرێن
ئەحمەد مستەفا
کارمەندەکانی شارەوانیی هەولێر هەڵمەتێکی فراوانیان بۆ رێکخستنەوەی شەقامەکانی شار دەستپێکردووە، وەک دەڵێن، بۆ پاراستنی سیمای شار و بایەخدان بە ژینگە و جوانییەکانی هەولێرە.
ئەمڕۆ شەممە 26.9.2026، تیمەکانی بەڕێوەبەرایەتی شارەوانیی چوار، بە هەماهەنگی لەگەڵ پۆلیسی شارەوانی، دەستیان بە لابردنی تابلۆ و ریکلامە بازرگانییە نایاساییەکان کردووە کە لەسەر شەقامی سەرەکی کۆیە ـ کەسنەزان هەڵواسراون.
بەپێی راگەیاندنی سەرۆکایەتیی شارەوانیی هەولێر، ئەم هەنگاوە بە مەبەستی رێگریکردن لە شێواندنی دیمەنی شار و رێکخستنەوەی رووکاری شەقامە گشتییەکان ئەنجام دەدرێت.
سەرۆکایەتیی شارەوانیی هەولێر دەڵێ، هەڵمەتەکە لە رێگەی هەر شەش بەڕێوەبەرایەتییەکەی شارەوانی بەردەوام دەبێت، بۆ ئەوەی شەقامەکان بە شێوەیەکی رێکخراوتر و جوانتر بپارێزرێن.