لە ماڵەکەی خۆیدا تەقینەوەی مین کوشتی

964+

هاوبەش ئەبوبەکر

شەوی رابردوو لە گەڕەکی راپەڕینی شاری سلێمانی هاوڵاتیەک لە ماڵەکەی خۆیدا مین پێیدا تەقیەوە و بەو هۆیەوە گیانی لەدەستدا.

ئەمڕۆ چوارشەممە، دەزگای گشتی کاروباری مین لە فەیسبوکی خۆی رایگەیاند “شەوی رابردوو 31-01-2023 لە گەڕەکی راپەڕینی شاری سلێمانی ھاوڵاتیەک بەناوی ستار ئەحمەد مەمەند لەدایکبووی ساڵی 1983 لە ماڵەکەی خۆیدا بەھۆی تەقینەوەی مینێکەوە گیانی لەدەستداوە.”

تۆڕی 964 زانیویەتی، ستار ئەحمەد بەهۆی دەستکاریکردن، مینەکەی پێدا تەقیوەتەوە و دەستبەجێ گیانی لەدەستداوە.

ستار ئەحمەد خێزاندارە و لەکاتی تەقینەوەی مینەکە هیچ ئەندامێکی خێزانەکەی لەو ژوورە نەبوون کە رووداوەکە تێیدا روویداوە.