لە عێراقەوە هێرشکراوەتە سەر سوپاى ئیسرائیل

وریا فەتاح

خەریکە عێراقیش لەو گرژییە تێوە دەگلێت کە لە ناوچەکەدا هەیە، ئەوەتا ئەمڕۆ هەینى سوپاى ئیسرائیل، کوژرانى دوو سەربازى وڵاتەکەى راگەیاند کە لە ئەنجامى هێرشێکى فڕۆکەى بێفڕۆکەوانییەوە کوژراون و لە عێراقەوە ئەنجامدراوە.

وەک باسکراوە، دوێنێ پێنجشەممە فڕۆکە بێفڕۆکەوانەکان لە عێراقەوە هەڵدراون و بنکەیەکى سەربازى لە باکورى ئیسرائیل بە ئامانج گرتووە.

بەپێى راگەیەنراوى سوپاى ئیسرائیل بێت، لە هێرشەکە دوو سەربازى تەمەن 19 ساڵ کوژراون و 24ـى دیکەش بریندارن.

لاى خۆیەوە بەرەى مقاوەمەى ئیسلامى لە عێراق، لە رێگەى چەناڵە تێلگرامییەکانى خۆیانەوە، بەرپرسیارێتى خۆیان لە هێرشە درۆنییەکەى سەر سووپاى ئیسرائیل لە ئەستۆگرت.