تاریکە بازاڕەکەی خانەقین خەریکە بە تەواوی تاریک دەبێت

+964
راژان باجەڵان – خانەقین

تاریکە بازاڕەکەی خانەقین خەریکە بە تەواوی چۆڵ دەبێت و بەشێک لە کاسبکارانی بازاڕەکەش داوا دەکەن گرنگی زیاتری پێبدرێت.

خانەقین کە یەکێکە لە شاڕێ ئابوورییەکان و بەردەوام ناوەندی ئاڵوگۆڕی بازرگانی بووە لە نێوان عێراق و ئێران، زیاتر لە سەدەیەک لەمەوبەر بازاڕێکی گەورەی تێدا دروستکراوە، کە بە تاریکە بازاڕ ناسراوە.

سەڵاح وەندی، کە بەرگدرووریەکی بازاڕەکەیە بە 964ـی وت، “زیاد لە نیوەی بازارەکە چۆڵکراوە بەبێ هۆ و خەڵکەکە بەرەو بازاڕە نوێیەکان دەچن، هەرچەندە لێرە کرێی مانگانەی دوکانێک لە نێوان 50 بۆ 100 هەزار دینارە و لە شوێنەکانی دیکە نزیکەی 10 هێندەیە” .
عەلی بەرزنجی دوکاندارێکی بەتەمەنی تاریکە بازاڕی خانەقینە و مێژووی بازاڕەکەی بۆ 964 گێڕایەوە و وتی، “زۆربەی هەرەزۆری ئەم بازاڕە هی جووەکان بووە و هەر ئەوان بە شێوازە بیناسازییە تایبەتییەکانی خۆیان بونیادیان ناوە”.

“زۆربەی ئەم دوکانانە لە بنەڕەتدا هی جووەکان بووە و تاپۆی یەکەمیان تا ئێستا لای حکومەتە، هەرچەندە پاش کۆچی جووەکان بەناوی خەڵکانی تر کراون یان هەندێک بە ئەمانەت وەریانگرتوون، بەڵام ئەگەر بێن و بە دوای مامەڵەکانیان بکەونەوە ئەوا بە ئاسانی خاوەنی راستەقینەیان دەردەکەوێت”، عەلی بەرزنجی وای وت .

عەلی زوهێر بەڕێوەبەری شارەوانیی خانەقین بە 964ـی وت، سەبارەت بە چۆڵکردنی ئەو بازاڕە، ئێستا هیچ پلانێکیان نییە، چونکە بازاڕەکە موڵکی شەخسی و تایبەتییە و خاوەنەکانیان ئازادن لە چۆنیەتی مامەڵەکردن پێوەی .

تاریکە بازاڕی خانەقین زیاتر لە 100 دوکان لەخۆدەگرێت، کە مێژووەکەی بۆ سەروو سەدەیەک دەگەڕێتەوە، هەرچەندە بەشێک لە دوکانەکان رووخاون و نۆژەن کراونەتەوە و بەوەش سیمای بازاڕکە گۆڕاوە، بەڵام هێشتا بۆ خانەقینییەکان جێی بایەخە و سەردانی دەکەن.

پێداچوونەوە: شۆڕش قادری