بەرگی کتێبەکە بە شێوەزارەی کرمانجی - وێنە: ئاژانسی میهر.
ناوی "مێژووی ئەدەبی کوردی"ـیە
کتێبە گرنگەکەی مارف خەزنەدار بە شێوەزاری کرمانجی چاپکرا
964+
پێشەوا محەمەد
کتێبی “مێژووی ئەدەبی کوردی”ـی نووسەری ناوداری کورد مارف خەزنەدار بە شێوەزاری کرمانجی چاپ کرا، کە لێکۆڵینەوەیە لە مێژووی ئەدەبی کوردی.
کتێبەکە لە حەوت بەرگ و زیاتر لە سێ هەزار لاپەڕەدا چاپ بووە و ئێستا لە کتێبفرۆشییەکاندایە.
کتێبەکە لە لایەن هەریەکە لە؛ ئیبراهیم شادمان، سەرگوڵ ئارەش، بەسام مستەفا، موراد میلان و رۆنیا چالییەوە خراوەتە سەر شێوەزاری کرمانجی.
ئەو کتێبە بە یەکێک لە گرنگترین کتێبەکانی کتێبخانەی کوردی دادەندرێت، کە نووسەر لە کۆتاییەکانی تەمەنیدا نووسیویەتی و کۆتا کتێبیشی بووە و هەر بەرگێکی تەرخان کراوە بۆ قۆناغێکی مێژووی ئەدەبیاتی کوردی.
مارف خەزنەدار لە ساڵی 1930 لە شاری هەولێر و لە بنەماڵەی خەزنەدارەکانی هەولێر لەدایک بووە. قوناغەکانی خوێندنی سەرەتایی و ناوەندی و ئامادەیی لە هەولێر تەواو کردووە. لە زانکۆی بەغدا لە بەشی زمانی عەرەبی خوێندویەتی. لە ساڵی 1968 چووەتە روسیا و لەوێ بڕوانامەی دکتۆرای لە ئەدەبی کوردی بەدەست هێناوە. پاشان گەڕاوەتەوە و بووە بە مامۆستای بەشی کوردیی زانکۆی بەغدا و ھەروەھا بەشی ئەدەبیاتی زانکۆی عەننابی جەزائیر و بەشی ئەدەبیاتی زانکۆی سەلاحەدین لە ھەولێر.
ساڵی 2010 لە تەمەنی 80 ساڵیدا لە شاری هەولێر گیانی لەدەست داوە و “مێژووی ئەدەبی کوردی” دوا کتێبی نووسراوی ئەو بوو.
