لە 20 وڵاتەوە بۆ پێشانگای نێودەوڵەتی کتێب هاتوونەتە سلێمانی

ئەحمەد مستەفا

پێنج رۆژی دیکە لە سلێمانی پێنجەمین پێشانگای نێودەوڵەتی بۆ کتێب بە بەشداری 20 وڵات دەکرێتەوە.

رۆژی 23.11.2023 پێشانگاکە بەرووی کڕیاران دەکرێتەوە و بڕیارە 10 رۆژ بەردەوام بێت و رۆژی 2.12.2023 کۆتا رۆژی دەبێت.

ئەمجارە زیاتر لە 200 ناوەندی چاپ و بڵاوکردنەوە، لە ناوەوە و دەرەوەی هەرێمی کوردستان هاتوونەتە سلێمانی.

ئەمڕۆ شەممە حەسەن رەحیم، رێکخەری پێشانگای نێودەوڵەتی سلێمانی بۆ کتێب لە بڵاوکراوەیەکدا رایگەیاندووە، پێشانگاکە ملیۆنان کتێب و ناونیشانی تێدایە.

لە پێشانگەکەدا، ئەو ناونیشانانەی لەگەڵ رێنماییەکانی وەزارەتی رۆشنبیری حکومەتی هەرێمی کوردستان یەکنەگرنەوە، تایبەت ئەو بابەتانەی توندوتیژی خێزانی، ئاینی، نەتەوەیی، کلتوری و سیاسییان هەبێت رێگە بە نمایشکردنی نادرێت، بڕیاریش وایە، جگە لە پێشانگەی کتێب هیچ جۆرە فێستیڤاڵێک لە پێشانگەکەدا بەڕێوەنەچێت.

پێشانگەکە رۆژانە کاتژمێر 9:00ی بەیانی بۆ 6:00ی ئێوارە کراوە دەبێت، بەوتەی حەسەن رەحیم بێت، “پاس لە ناوەندی سلێمانی و دەرەوە دابینکراوە بۆ ئەو هاوڵاتی و سەردانکەرانەی دەیانەوێت سەردانی پێشانگەکە بکەن، کە بنکەی سەرەکییان لە سلێمانی بەردەم باخی گشتی دەبێت لە سەرەتای شەقامی سالم”.