نموونەیەک لە تەماتە خراپبووەکە - وێنە: کشتوکاڵی سلێمانی.
دەردی کشتوکاڵی تینی بۆ جوتیارێکی سنووری قەزای دوکان هێناوە
964+
پێشەوا محەمەد
جوتیارێکی گوندی قەمچوغەی سەر بە قەزای دوکان بە دەست دەردی کشتوکاڵی بەرهەمەکانییەوە دەناڵێنێت و کشتوکاڵی دوکانیش دەڵێت، “چارەسەری ئاسان نییە”.
ئەو جوتیارە خاوەنی 14 خانووی پلاستیکییە، چواریان تەماتەن و 10 دانەی تریشیان کولەکەن.
ئەو دەردانەی تووشی بەروبوومی ئەو جوتیارە بوون بریتین لە پەڵەی رەش و رووتانەوە و دروستبوونی گرێ لە بەرهەمەکاندا.
964 لە زاری هەمزە عومەر عارف، خاوەنی خانووە پلاستیکییەکانەوە دەزانێت، بەرهەمەکانی لە کاتی پێگەیشتندا تووشی ئەو دەردانە دەبن و لەناودەچن.
ناسکە عومەر فەتاح، لێپرسراوی هۆبەی پاراستنی رووەک لە کشتوکاڵی دوکان بە 964ـی وت، “هۆکاری نەخۆشی بەروبوومەکانی ئەو جوتیارە ماندووێتی خاکەکەیەتی، چونکە چەند ساڵێکە ئەو بەیتە پلاستیکیانەی هەیە و هەموو وەرزەکانیش بەرهەمی تێدا کردوون”.
پێشی وایە چارەسەرەکەی ئاسان نییە، “چونکە دەبێت دووبارە خاکەکەی بە پیت بکرێتەوە و خانووە پلاستیکییەکان هەڵبگێڕدرێنەوە”.