مێسی. فۆتۆ: سۆشیال میدیا
لەبەر خاتری مێسی یاریگەکانی ئەمریکا چیمەنەکانیان دەگۆڕن
+964
ژووری ههواڵ
لیۆنێل مێسی بەرپرسانی یانەکەی ئاگادارکردووەتەوە ئامادە نییە لەو یاریگەیانە یاریی بکات کە چیمەنەکانیان دەستکردە، هەر لەبەر ئەوە شەش یانەی گەورە کەوتوونەتە خۆیان بە پەلە چیمەنەکانیان دەکەنە سروشتی و بەشێک لە یاریگەکانیان نۆژەندەکەنەوە.
میدیاکانی ئەمریکا دەڵێن، مێسی هەر کە گرێبەستەکەی لەگەڵ ئینتەر مەیامی ئیمزا کردووە رێک خستوویەتیە دەستیانەوە و وتوویەتی هەر یاریگەیەک چیمەنەکەم بە دڵ نەبێت یاری تێدا ناکەم، یانەکانیش ئەمەیان بیستووە و شپرزە بوون، چونکە یارینەکردنی مێسی گورزی گەورەی ئابووریان لێدەدات و جەماوەرەکەشیان توڕە دەکات، بۆیە شەش یانە کە یاریگاکانیان لە چیمەنی دەستکرد پێکهاتووە، یەکسەر دەستیان کردووە بە گۆڕینی.
رێکخەری دەستەی خولی ئەمریکا بۆ تۆپی پێ ئەم زانیارییەی پشتراست کردووەتەوە و بە سایتی سپۆرت پیپڵی وتووە: هاتنی مێسی ناچارمان دەکات زۆر گۆڕانکاری لە یاریگەکاندا بکەین.
دەردی یاریگەکانی ئەمریکا چەند یاریزانێکی پیشەگەری پێشووی ناڕەحەت کردبوو، هەریەک لە دەیڤد بێکهام و ئیبراهیمۆڤیچ کە پێشتر لەو خولەدا یارییان کردبوو زۆر ناڕازی بوون لە چیمەنە دەستکردەکان، بێکهام وتبووی تا سێ رۆژ دوای یارییەکە ئازار لە جەستەتدا دەبێت، ئیبراهیمۆڤیچیش وتبووی ئەو چیمەنە زۆر تیژ و زبرە و ئەگەری پێکان زیاد دەکات، بەڵام دیارە ئەو دوو یاریزانە بە حاڵەکە رازیبوون و بەڕێیانکردووە، بەڵام مێسی رۆژی خۆیەتی و قبوڵی ناکات.
