دکتۆر پشدەر عەبدوڵا: لای خۆتانەوە دەرزی گەشە لە منداڵەکانتان مەدەن

964+
دیلان محەمەد جەزا

هەندێک لە منداڵان لە تەمەنی بچوكیدا پێویستیان بە دەرزی گەشە هەیە، بەڕێوەبەری نەخۆشخانەی منداڵانی سلێمانی دەڵێت، ئەگەر بەشێوەیەكی زانستی دەرزییەكە بەكارنەهێندرێت منداڵەكە تووشی نەخۆشی دەكات.

دكتۆر پشدەر عەبدوڵا بەڕێوەبەری نەخۆشخانەی منداڵانی سلێمانی بە 964ـی وت، ساڵانە 500 منداڵ دەرزی گەشەیان لێدەدرێت بەشێوەیەكی زانستی.

ئەم دەرزییە ناوی دەرزی گەشەی منداڵە، ئەگەر منداڵێك سەردانی نەخۆشخانەی منداڵانی سلێمانی بكات، پشكنینی بۆ دەكەن، ئەگەر پێویستی پێبوو دەرزیەكەی بۆدەكرێت، زۆر پێویست بێت دەرزییەكەی چەند جارێك بۆ دەكرێت، بەڵام هەندێك هاوڵاتی لە دەرەوەی نەخۆشخانەكانی دەوڵەت ئەم دەرزیە بۆ منداڵەكانیان بەكاردەهێنن.

ئەم دەرزییە بۆ گەشەی باڵا و جوانكاری بەكاردێت، بەڵام ئەگەر زانستی نەبێت منداڵەكە تووشی نەخۆشی شێرپەنجەی خوێن و فشاری خوێن و شەكرە و نەخۆشی دیكەش دەكات.

964 سۆراغی کرد، دەرزییەكە دوو جۆری هەیە لە عێراق، یەكێكیان لە بەغدادەوە دێت بۆ هەرێم و بە 200 هەزار دینارە و یەكێكی دیكەیان ئێرانیە و نرخەكەی لە 30 هەزار دینارە.

دكتۆر پشدەر عەبدوڵا، داوا لە هاوڵاتیان دەكات كە ئەم دەرزییە لە دەرەوەی نەخۆشخانە فەڕمیەكان بەكارنەهێنن چونكە مەترسی گەورە دروستدەكات.

پێداچوونەوە: كوردستان ئەحمەد