بیبەری خۆمانە پێگەیشت

964+
كوردستان ئەحمەد

دوو جۆر بیبەر لە هەرێمی كوردستان پێگەیشتوون، شیرین و توون و لە قەبارەی ورد و گەورە، ئەمڕۆ خرانە بازاڕەوە.

بیبەری شیرین و بیبەری توون، هەردوكیان رەنگیان سەوزە، قەبارەی شیرینەكە گەورەیە و تامێكی شیرین و مەیلەو تفتی هەیە، كە پێدەگات رەنگی بۆ سوور و پرتەقاڵی دەگۆڕێت، بیبەرە توونەكە، درێژ و باریكە هەندێك جۆری وردە و زۆر توونە.

ئێستا لە بازاڕدا كیلۆی  بیبەری شیرین دوو هەزار دینار دەكات و بیبەرە توونەكەش كیلۆی چوار هەزار دینارە .

خاكی هەرێمی كوردستان لە بار و بەپیتە بۆ بەرهەمهێنانی بیبەری توون و شیرین، سێ مانگی دەوێت تا بەبەرهەم دەگات و بە درێژایی وەرزی هاوین بەرهەمی هەیە.

تۆوەكەی ورد و رەش و سپییە، بەهێزە و بەرگەی گەرما و سەرما و كەمئاوی دەگرێت، بە شێوەی شەتڵ دەكرێت.

شەتڵكردن بریتییە لە كرداری گواستنەوەی شەتڵی بیبەر لە ناو لوولەیەكی نایلۆنیدایە، یەك مانگ بە شێوەی شەتڵ دەمێنێتەوە و دواتر جووتیارەكان لە زەوی دەیچێنن و بە سێ مانگ بەرهەمی دەبێت.

لە رووی تەندروستییەوە بیبەر حەوت سوودی هەیە، یەكێكە لە سەوزە دڵخوازەكان لای هاوڵاتیان و بە وشكی و بە تەڕیش دەخورێت.

بیبەری توون وشك  دەكرێتەوە، 15 رۆژ دەخرێتە بەر خۆر و دواتر دەهاڕدرێت و بە شێوەی بەهارات دروست دەكرێت.