سەندیکای کرێکاران: مامەڵەی هەندێک کۆمپانیا لەگەڵ ژینگەپارێزان گونجاو نییە

964+

پێشەوا محەمەد

لقی سلێمانی سەندیکای کرێکاران رێکاری یاسایی بەرامبەر هەندێک کۆمپانیا دەگرێتەبەر، بە وتەی خۆیان مامەڵەیان لەگەڵ ژینگەپارێزان گونجاو نییە.

سەندیکاکە پڕۆژە و کۆمپانیاکانی ئاگادار کردووەتەوە، کە وەرزەکانی هاوین و زستان دەبێت گواستنەوەی کرێکاران و ژینگەپارێزان بە شێوەی گونجاو بێت و نابێت لە پشتی ئۆتۆمبێلەکانەوە سەربخرێن.

“ئەم ماوەیە وێنەیەک بڵاوبووەوە ژمارەیەک ژینگەپارێز خراونەتە پشتی ئۆتۆمبێلێک کە پیسی کۆدەکاتەوە و ژینگەپارێزەکان لەناو پیسییەکە دانیشتوون”، ئەوە وتەی چالاک رەئوف، سەرۆکی لقی سلێمانی سەندیکای کرێکارانی کوردستانە بۆ 964.

وتیشی، “ئێمە رێکاری یاسایی بەرامبەر هەر کۆمپانیایەک دەگرینەبەر بە شێوەی نەگونجاو مامەڵە لەگەڵ ژینگەپارێزان و شوێنی مانەوە و گواستنەوەیان بکەن”.