پۆلیسی چەمچەماڵ دەڵێت وەرن چەکەکانتان تۆمار بکەن

964+

پێشەوا محەمەد – سلێمانی

دانیشتوانی چەمچەماڵ و ناحیەکانی دەروبەری ئاگادار دەکرێنەوە بۆ تۆمارکردنی ئەو چەکانەی بێمۆڵەتن. پۆلیسی شارەکە تا 21.7.2023 دەوەستێت و دواتر رێکاری تووند دەگرێتەبەر.

چەکەکان جۆری تفەنگ و دەمانچە دەگرێتەوە و لە کاتی تۆمارکردنیاندا فۆڕمێکیان پێدەدەرێت، کە وەک مۆڵەتی سەرەتایی هەژمار دەکرێت تا خاوەنەکەی مۆڵەتی فەرمی بۆ دەردەهێنێت.

پۆلیسی چەمچەماڵ کەمێک بەرلەئێستا بڵاویکردووەتەوە، “ئەم رێکارانە بۆ سنووردارکردنی دیاردەی چەکداری و کەمکردنەوەی رووداوی نەخوازراوە لە سنووری قەزاکەمان”.

“لەدوای 21.7.2023 هەر چەکێک تۆمار نەکرابێت، رێوشوێنی تووند دەگرینەبەر کە دەستبەسەرداگرتن، سزای مادی و بەندکردنی خاوەنەکەی دەگرێتەوە”، ئەوەش لە راگەیەندراوەکەی پۆلیسی چەمچەماڵدا ئاماژەی پێدراوە.