تەرزە و بارانەکەی گەرمیان زیانی بە 30٪ی بەرهەمی جوتیاران گەیاندووە

+964

هونەر فارس – گەرمیان

باران و تەرزەکەی شەوی رابردوو زەرەری لە بەشێک لە بەروبومی جوتیارانی گەرمیان داوە، بە وتەی کشتوکاڵی گەرمیان.

لە گەرمیان وەرزی دروێنە دەستیپێکردووە و نزیکەی %50ـى دانەوێڵەی جوتیاران دروێنەکراوە و بەشێکی زۆری ئەوەشی کە بەپێوەیە، باران و تەرزەی شەوی رابردوو زیانی پێگەیاندوە.

شادیە حسێن، بەڕێوەبەری کشتوکاڵی گەرمیان بە 964ی راگەیاند، لەو بەشەی کە دروێنە نەکراوە پێشبینیدەکرێت نزیکەی 30٪ زیانی بەرکەوتبێت.

تەنیا لە 24 کاتژمێری رابردوودا لە کەلار، 14 ملیمەتر و لە کفری 15.5 ملیمەتر باران باریوە، جگە لەو رێژە بارانە تەرزەی بەهێزیش بەشێک لە ناوچەکانی گەرمیانی گرتەوە.

بۆ ساڵی 2023 لە گەرمیان، 184 هەزار و 354 دۆنم زەوی کشتوکاڵ لەلایەن سێ هەزار 654 جوتیارەوە بە گەنم چێندراون.