بانکەکانی ئێران دەکرێنەوە

ژێوار خدر

سەرجەم لقەکانی بانک لە سەرتاسەری ئێران دەکرێنەوە و لە بەیانی رۆژی شەممەوە دەست بە کارەکانیان دەکەنەوە، ئەم هەنگاوە دوای ماوەیەک لە پەککەوتنی دەوامی بانکەکان دێت کە بەهۆی بارودۆخی شەڕ و ئاڵۆزییە ئەمنییەکانەوە داخرابوون.

ئاژانسی هەواڵی فەرمی ئێران (ئیرنا) بڵاویکردەوە، بڕیاری کردنەوەی بانکەکان هەموو پارێزگاکان دەگرێتەوە، ئاماژەی بەوەش کردووە، هاوڵاتییان دەتوانن لە سبەی  شەممە 11.4.2026ەوە بۆ راییکردنی کارە داراییەکانیان سەردانی بانکەکان و لقەکانیان بکەن.

داخستنی بانکەکان وەک رێکارێکی فریاگوزاری بوو لە کاتی چڕبوونەوەی گرژییە سەربازییەکانی نێوان تاران و ئیسرائیل، ئێستا لەگەڵ دەستپێکردنی دانوستانەکانی پاکستان بۆ گەیشتن بە ئاگربەست، دەسەڵاتدارانی ئێران هەوڵدەدەن لەرێگەی کردنەوەی بانکەکانەوە دۆخی ئابووری و بازاڕی ناوخۆ ئاسایی بکەنەوە.