لەماوەی پێنج رۆژدا زیاتر لە 558 تۆن گۆشتی سوور هاتووەتە بازاڕی سلێمانی
964+
ئاودێر عومەر-سلێمانی
سەرەڕای گرانی نرخی گۆشتی ئاژەڵ، بەڵام ئاماری کوشتارگەی سلێمانی دەریدەخات لەماوەی تەنیا پێنج رۆژدا زیاتر لە 558 تۆن گۆشت رەوانەی بازاڕی سلێمانی کراوە.
هاتنی جەژنی رەمەزان، خواستی زۆری لەسەر گۆشتی ئاژەڵ دروست کردووە، ئێستا لە بازاڕی سلێمانی کیلۆی گۆشت لە نێوان 19 بۆ 20 هەزار دینارە.
شاڵاو عارف، بەڕێوەبەری کوشتارگەی سلێمانی بۆ 964 دەڵێت: لە ماوەی پێنج رۆژی رابردوودا 295 تۆن و 800 کیلۆ گۆشتی ئاژەڵی گەورە و زیاتر لە 263 تۆن گۆشتی ئاژەڵی بچووک، رەوانەی بازاڕەکانی شاری سلێمانی کراون.
بەڕێوەبەری کوشتارگەی سلێمانی ئەوەشی وت، تەنیا لە ماوەی 24 کاتژمێری رابردوودا، 120 تۆن گۆشت رەوانەی بازارەکانی سلێمانی کراون، کە 48 تۆن گۆشتی ئاژەڵی گەورە و 72 تۆن گۆشتی ئاژەڵی بچووک بووە.
بە پێی ئاماری کوشتارگەی سلێمانی، لەماوەی پێنج رۆژی رابردوودا، سێ تۆن و 650 کیۆ گۆشت نەشیاو بووە و رەتکراوەتەوە.
پێداچوونەوە: فەهمی نەبی