لە رانیە
537 کارتۆن خواردنه‌وه‌ی كحولیی له‌ناوده‌برێن
+964
ژێوار خدر – راپەڕین
ئەمڕۆ 18.4.2023 لیژنە هاوبەشەکانی قایمقامیەتی قەزای رانیە بە هاوبەشی بەشی ئابووری لە بەڕێوەبەرایەتی ئاسایشی راپەڕین، لە شارەدێی بۆسکێنی سەربە ئیدارەی راپەڕین بڕی (537) کارتۆن خواردنەوەی کحولی، کە تەزویرکراو و فەل بوو، لەناو دەبەن.
کارزان سلێمان سەرۆکی لیژنە هاوبەشەکانی قایمقامیەتی قەزای رانیە بە تۆڕی 964 ی راگەیاند، نزیکی دوو ساڵ لەمەوبەر دەستیان بەسەر537 کارتۆن خواردنەوەی کحولی گرتووە بەهۆی ئەوەی کە ئەو خواردنەوانە بارکۆدەکەیان تەزویرکراو بوو، هەروەها فەلیش کرابوو، بۆیە ئەمڕۆ بڕیارە لە کلکەی کۆڵین ژێرخاک بکرێن و لەناوببرێن.
وتیشی: خاوەنەکەی رادەستی یاسا دەکرێت.
بە پێی زانیارییەکانی تۆڕی 964 ئەو خواردنەوە کحولییانە دوو ساڵە هەڵگیراون و ئێستا بڕیاری لەناوبردنیان دراوە.
پێداچوونەوە: ئەرسەلان عەبدوڵا