دوای پێنج مانگ

قوربانیانی بەشە ناوخۆییەکەی دهۆک قەرەبووکرانەوە

+964

عەمار عەزیز – دهۆک

لەدوای پێنج مانگ، رۆژی چوارشەممە ئەو خوێندکارانە قەرەبووکرانەوە کە بەهۆی تەقینەوەی تانکی غاز لە بەشە ناوخۆیی دهۆک، زیانی ماددیان بەرکەوت.

هشیار واحید، خوێندکار لە پەیمانگای وەرزشی دهۆک، یەکێک بوو لە قوربانییەکانی تەقینەوەکە، ئەو بە 964ی وت، لەلایەن لیژنەیەک لە وەزارەتی پەروەردە، وەک قەرەبوو هەر خوێندکارێک 408 هەزار دیناری وەرگرت.

“ئەمە جاری دووەمە هاوکاری وەردەگرین، جاری یەکەم بڕی 200 دۆلارمان وەرگرت،” هشیار واحید وای وت.

کۆی گشتی ئەو پارەیەی وەک قەرەبوو ئەمڕۆ درا بە خوێندکارەکان، 20 ملیۆن دینار بوو، دابەشکرا بەسەر 49 خوێندکاردا.

رۆژی 22.11.2022 بەهۆی تەقینەوەی تانکی غاز، لە سەربانی بەشە ناوخۆییەک لە دهۆک، چوار کەس گیانیان لەدەستدا و 33 کەس برینداربوون، دووان لەوان ئەفسەر و پۆلیس بوون.

هەر لەدوای تەقینەوەکە و سوتانی بەشە ناوخۆییەکە، هەموو خوێندنکارەکان گواسترانەوە بۆ بەشە ناوخۆییەکی تر.

پێداچوونەوە: هاوبەش ئەبوبەکر