لە گەڕەکی بناری قەزای خورماتوو
چەند عەمودێک لە ناوەڕاستی جادەدا قوت بوونەتەوە و کێشەیان دروستکردووە
964+
سیروان خورشید – خورماتوو
لە گەڕەکی بناری قەزای خورماتوو چەند عەمودێک لە ناوەڕاستی جادەکەدا قوت بوونەتەوە و هەر تاوناتاوێک سەیارە خۆیان پێدا دەکێشێ، ئێوارەی ئەمڕۆ بەشێک لە دانیشتووانی ئەو گەڕەکە گردبوونەوە و ناڕەزایی خۆیان لەسەر ئەو بابەتە دەربڕی.
خەلیل ئەحمەد یەکێک لە دانیشتووانی گەڕەکی بنار بە 964ـی وت، “جگە لەوەی گەڵابە بێزاری کردووین و لەمسەر بۆ ئەو سەری کۆڵانەکە دەکەنە زبڵ و خاشاک، ئەم عەمودانەش بوونەتە کێشەیەکی گەورە”.
“گەڵابە دای لە یەکێک لە عەمودەکان، خەریکبوو ئاگرماندا”، مام خەلیل وای وت.
سەبارەت بەو کێشەیە 964 قسەی لەگەڵ فازڵ عەباس بەڕێوەبەری فەرمانگەی کارەبای خورماتوو کرد، ئەو وتی، “ئەم بابەتە پەیوەندی بە ئێمەوە نییە و پەیوەندی بە فەرمانگەی ئاوی قەزاکەوە هەیە”.
فەرمانگەی ئاوی خورماتووش بەرپرسیارێتی چارەسەرکردنی ئەو کێشەیەی خستەئەستۆی شارەوانی قەزاکە، 964 پەیوەندی بە بەڕێوەبەری شارەوانی خورماتووەوە کرد، بەڵام وەڵامی پەیوەندییەکەی نەدایەوە.
پێداچوونەوە؛ شۆڕش قادری