داهاتی نانەوتی پارێزگاکانی سلێمانی و هەڵەبجە لە 13 ملیار و 600 ملیۆن دینار نزیک بووەتەوە
نانەوتییە و بزانە چەندەی نەختە؟
داهاتی ئەم هەفتەیەی سلێمانی و هەڵەبجە نزیکەی 13 ملیار و 600 ملیۆن دینارە
شۆڕش قادری
داهاتی نانەوتی پارێزگاکانی سلێمانی و هەڵەبجە بەهەردوو ئیدارەی گەرمیان و راپەڕینەوە، بۆ ئەم هەفتەیە نزیکەی 13 ملیار و 600 ملیۆن دینارە.
بەپێی نوێترین داتا و ئاماری ماڵپەڕی شەفافیەت، داهاتی نانەوتیی هەردوو پارێزگای سلێمانی و هەڵەبجە و هەردوو ئیدارەی راپەڕین و گەرمیان لە رۆژی 25.7.2026 تا ئەمڕۆ هەینی 31.7.2026، 13 ملیار و 595 ملیۆن و 796 هەزار و 370 دینار بووە.
لە داهاتی ئەم هەفتەیەی پارێزگاکانی سلێمانی و هەڵەبجە، بڕی 10 ملیار و 600 ملیۆن و 574 هەزار و 37 دیناری بە شێوەی نەختینە و دوو ملیار و 994 ملیۆن و 148 هەزار و 333 دیناریشی چەک و ملیۆنێک و 74 هەزار دیناریشی مقاسە.
ماڵپەڕی شەفافییەت هەموو هەفتەیەک داهاتە نانەوتییەکانی هەریەکە لە پارێزگاکانی سلێمانی، هەڵەبجە و ئیدارە سەربەخۆکانی گەرمیان و راپەڕین دەخاتەڕوو.
ئەو داهاتەی ماڵپەڕەکە ئاشکرای دەکات، لە دەروازە سنوورییەکان، فڕۆکەخانە، گومرگ، کرێی کێش و پێوەرەکان، پێبژاردن و سزای دارایی، پشکنینەکان، رسووماتی بەخشین، ژینگەی ئۆتۆمبێل، تابلۆ و داهاتی شارەوانییەکان، بەدەستهاتووە.